СТРАТЕГИЙН ТҮНШЛЭЛ: «Хийморь Сүхбаатар Мах Импекс» ХХК Исламын Бүгд Найрамдах Иран Улстай мах экспортлох гэрээг амжилттай байгуулж, ажлаа эхлүүллээ

Монгол улсын махны салбарын чанар, стандартыг түүчээлэгч "Хийморь Сүхбаатар Мах Импекс" ХХК-ийн гадаад хамтын ажиллагаа шинэ шатанд гарч, Исламын Бүгд Найрамдах Иран Улс руу Халал аргаар бэлтгэсэн мах экспортлох албан ёсны гэрээг амжилттай үзэглэлээ.

Энэхүү стратегийн ач холбогдолтой гэрээ баталгаажсаны дагуу Иран улсын мал эмнэлэг, хорио цээр болон техникийн хяналтын албаны төлөөлөгчид манай үйлдвэрт биечлэн ирж, экспортын бэлтгэл ажилтай танилцан, хамтын ажиллагаагаа албан ёсоор эхлүүллээ.

Төлөөлөгчдийн зүгээс үйлдвэрийн технологийн дамжлага, эрүүл ахуйн чанарын удирдлагын тогтолцоо, мал эмнэлгийн хорио цээрийн дэглэм болон Халал стандартын дагуу мах бэлтгэх орчин нөхцөлтэй газар дээр нь нарийвчлан танилцаж, өндөр үнэлэлт өгөв. Ингэснээр талууд гэрээний дагуу эхний ээлжийн экспортын ажиллагааг техникийн болон зохицуулалтын ямар нэгэн саадгүйгээр, шуурхай эхлүүлэхээр тохирлоо.

Хамтын ажиллагааны хүрээнд дараах ажлууд хэрэгжиж эхлээд байна. Үүнд:

Экспортын ажлын эхлэл: Иран улсын мэргэжилтнүүдийн хяналт, зааварчилгаа дор Олон улсын Халал стандартын шаардлагыг бүрэн хангасан мах бэлтгэлийн техникийн процесс үйлдвэр дээр албан ёсоор хэрэгжиж эхлэв.

Чанар ба хяналтын нэгдэл: Гэрээний дагуу хоёр улсын мал эмнэлгийн байгууллагуудын тохиролцсон стандартыг чанд мөрдөж, түүхий эд бэлтгэлээс эхлээд эцсийн бүтээгдэхүүнийг тээвэрлэх хүртэлх бүх шатанд дотоодын болон Иран улсын хяналтын баг хамтран ажиллаж байна.

Зах зээлийн тогтвортой байдал: Энэхүү гэрээ нь богино хугацааны худалдаа биш бөгөөд Монгол улсаас Дундад Дорнодын зах зээлд тогтвортой, урт хугацаанд, баталгаатай экспортын урсгалыг бий болгох суурь болж байна.

Манай компани цаашид ч дэлхийн жишигт нийцсэн дэвшилтэт технологи, менежментийг үйлдвэрлэлдээ нэвтрүүлж, Монгол улсын экспортын чадавхыг олон улсад бататгахын төлөө хариуцлагатай ажиллах болно.